【粤语】遗书

旁白：（吶喊）曾经我都想一了百了，不过凭咩系我呀？错嘅又唔系我？错嘅系呢个世界，系你哋……

闪回

同学 1：喂！喂！听讲 A 班嘅梓雯又晕低咗喇，佢果个到底系咩病啊？

同学 2：佢果个边度算系病啊！咪系扮可怜咯！

同学 1：扮可怜？唔似喎？听讲都畀老师抬咗出嚟嘅。

同学 2：唉！扮死边个唔识啊！嚟，接住我呀……

同学 1：唔好啦！唔好啦！你咁肥，边有嗰啲人咁弱不禁风，抬唔起你啊！

闪回

婶婶：哎呀！呢个雯雯都生得咁大个喇。嗰阵时咁细个，差啲就畀水浸死咗。

梓雯：浸死？

婶婶：系呀！你妈生咗第三个都仲系个女嘅，真系冇办法，不过，好彩最后都系唔忍心，将你留低咗，你睇，依家都读大学喇！赚到钱喇啩？

梓雯：（内心）原来我自细就系嗰个畀人抛弃果嗰一个。

闪回

爸爸：嗰个系你细佬，你作为家姐，就应该多啲让佢。

梓雯：佢又唔系净系得我一个家姐。

爸爸：你比较识做。

梓雯：（内心）我比较识做？我想识做咩？我只系想你哋多啲望下我啫

旁白：曾经我都想一了百了。我唔怕死，我惊死咗之后，你哋伤心，但系有一日，我发现，原来我谂多咗。

闪回

梓雯：家姐，你话，如果我死咗，你会唔会挂住我啊？

梓桦：唔会，挂住你做咩，就算挂住，时间都会冲淡一切，慢慢就唔会挂住喇。所以，你应该问，会挂住你几耐，而唔系问会唔会挂住你。

梓雯：咁你会挂住我几耐？

梓桦：唔知，可能一秒，可能一分钟，可能一个钟，可能一日，可能就唔挂住喇，死都死咗喇，挂住你做咩呢？你话系咪？

闪回

梓雯：细佬，如果我死咗，你会唔会挂住我咩？

子阳：肯定唔会，我会憎你。

梓雯：点解？

子阳：因为，我唔比你将所有嘅烂摊子都留畀我。

梓雯：（内心冷笑）原来我连选择死嘅权利都冇。

闪回

梓雯：妈，如果，有一日，我唔喺度喇，你会唔会挂住我？

妈妈：你成日谂啲冇用嘅嘢做咩，多啲谂下点样搵钱唔实际咩？

梓雯：妈……

妈妈：你系我生嘅，唔好以为我唔知你喺度谂咩？讲，你系咪又开始食药喇？

梓雯：妈，我冇……

梓雯：（内心）但系，妈，你知唔知啊，如果冇药物嘅控制，我可能会控制唔住自己杀咗你，杀咗自己。（冷笑）

旁白：曾经我以为我可以畀人救赎，点知系你哋一步一步将我推落深渊嘅。

闪回

梓雯：老师，我可唔可以信你？

心理咨询师：你信唔信？

梓雯：我唔知，不过我想信你，从我选择嚟搵你嗰阵就开始信你喇啩？咁你呢？抵唔抵得我信啊？

心理咨询师：梓雯，我会一直陪住你嘅。

梓雯：你系咪对好多咨询者都承诺过啊？

心理咨询师：因为，呢啲系作为心理咨询师嘅职责同义务。

梓雯：但系，你都做得到咩？

梓雯：（黑暗面）佢冇做到，佢冇做到佢嘅承诺一直陪住我，每次我微信搵佢，佢都话好忙，系呀！佢系属于每一个人嘅，佢唔只属于我，既然系咁，佢当初又点解要承诺呢。

梓雯：因为佢想你对生活有希望，佢想你对生有希望。

梓雯：（黑暗面）唔系噶，佢只不过系担心我喺佢嘅咨询下出事啫！佢会咁做只系为咗自己嘅利益，唔系为咗我。

梓雯：唔系噶，佢咁好啊，佢仲教识我放开自己，学识爱自己，学识爱生活。

梓雯：（黑暗面）结果呢？

梓雯：（黑暗面）结果，你畀人呃咗，唔单止畀人呃咗钱，仲畀人呃咗色。

梓雯：唔系噶，唔系佢嘅错，系我蠢，系我自己嘅错。

梓雯：（黑暗面）啱！系你蠢，系你选择信佢嘅说话，呢个世界所有人都系衰人，唔理做咩都只系顾住自己，从来都冇人在意你，你根本唔应该存在。

梓雯：唔系噶！唔系噶！唔系噶！唔系…… 系噶（喊）

闪回

梓雯：老师，呢几日我唔系好舒服，可唔可以请几日假啊？

老师：唔舒服？点样啊？

梓雯：情绪上有啲波动。

老师：咁你？请几日？

梓雯：三日。

老师：三日？你系咩大病啊？

梓雯：我…… 就系…… 有啲抑郁……

老师：抑郁？咪好似感冒咁嘅事啫？仲需要请三日假，你知唔知我以前读书嗰阵，成日都系一日去几个城市连住转。

梓雯：老师…… 我…… 就系挂住屋企喇，我想返下屋企。

老师：三日以上嘅假期需要主任签名，只要佢签名，我呢边冇问题。

梓雯：老师…… 我… 就系…… 挂住屋企喇，我想返下屋企。

老师：抑郁？依家边个冇啲抑郁症啊！你仲真系当自己好巴闭噉。

梓雯：（内心）啱呀！我…… 仲真系当自己好巴闭噉，将抑郁当回事咯。（嘲笑）

闪回

梓雯：思思喺唔喺度啊？

朋友：喺度

梓雯：思，我唔开心！

朋友：我嘅天啊，你又唔开心？你点解成日都唔开心啊？

梓雯：我…… 我都唔知？

朋友：唔知？我睇你就系太得闲喇。

梓雯：（内心）我谂，我可能真系太得闲喇，得闲到，每日都谂住点样死？（自嘲）

梓雯：我真系好爱你哋，所以先会喺我最冇办法嘅时候搵你哋，不过可能你哋讲得啱，我真系太得闲，太矫情喇。其实我一直都好想同你哋讲声对唔住，虽然可能讲出嚟有啲可笑，不过我真系真系真系唔系有心麻烦你哋噶，都系真系真系好想同你哋道歉，可能你哋唔信，不过每一次，我都会尽全力唔去麻烦你哋，但系，好可悲！最后我都仲系麻烦你哋喇。对唔住！对唔住！对唔住！重要嘅事要讲三次。如果有来生，我宁愿做一个懵懂嘅行动者，都唔做一个明白嘅思想家，太攰喇！攰到自己，都攰到人地。希望，你哋唔好挂住我，唔好憎我，等我随住浪花走喇！唔见喇！