麥兜：媽媽，我好肚餓啊
麥太：得啦，今日個午餐係乜嘢啊？
夥計：都係嗰啲嘢啦
麥太：即係乜嘢啊？
夥計：普普通通家常便飯咁啦
麥太：點家常法啊？
夥計：哦~咪又係來來去去有啲肉啊有啲菜啊撈埋撈埋打個生粉芡上去嗰啲嘢咁囉，你想跟-飯定跟意粉啊？
麥太：跟乜嘢嗟？你都冇講過午餐係乜
夥計：咁都係嗰啲嘢嘅啦，廿零蚊個餐又湯又剩唔通有得你食天九翅咩？　求求其其有啲肉有啲菜蛋白質澱粉質撈撈埋埋打個白汁茄汁黑椒汁咁撐得你懵口懵面咪『Lu­i』返去返工返學返廠返寫字樓囉　唔係你古真係穩餐晏仔咁簡單啊。咁跟飯定跟意粉啊？
麥兜：媽媽，我想跟飯啊
麥太：跟乜嘢飯嗟？食乜都未知啊
夥計：都估到啦，嚟嚟去去咪又嗰幾味嘢
麥太：邊幾味嘢啊？
夥計：咁都係嗰啲　豬肉牛肉　瓜瓜菜菜　粟咪肉粒　雙腸蛋飯　窩蛋牛飯　生炒牛飯　梅菜魭魚　味菜鮮尤　香茅豬扒　葡汁海鮮跟飯或意粉　三絲炒瀨　時菜斑球　香煎龍鯏　殺爹牛河　吉列斑塊　涼瓜煮魚　鮮茄牛　反炒貴刁　咖喱雞　芙蓉蛋　俄羅斯牛肉　夏威夷雞扒　焗葡國雞飯　豉椒排骨　肉醬意粉　宮寶雞丁跟飯或意粉
麥兜：媽媽，我要宮寶雞「燈」啊
麥太：怕唔怕辣啊，啲宮寶雞丁？
夥計：唔怕~今日午餐冇宮寶雞丁
麥太：冇你又講？
夥計：我舉例嗟
麥太：咁你舉夠未啊？
夥計：差不多啦
麥太：差幾多啊？
夥計：都七七八八啦
麥太：唔好七七八八啦，你舉埋佢先嘞
夥計：咁嚟嚟去去又確實不外乎嗰啲　滑蛋蝦仁　京都排骨　中式牛柳　西芹雞柳　紅燒豆腐　豉汁排骨　干炒牛河　叉燒煎蛋　魚香茄子　白汁雞絲跟飯或意粉　西炒飯　咕嚕肉　煙肉蛋　鹽焗雞　金沙骨　扎肉河　鹹魚雞粒飯　葡汁焗四蔬　蜆肉菠菜面　西西里牛肉　日式照燒雞　清湯牛白腩　滷水鵝肉　拼鹵蛋　刁草汁焗石斑，嗱~仲有燒肉雞　雞油雞　叉油雞　叉切雞　雞油雞切雞　雞叉燒肉　燒肉叉燒肉　叉雞叉油雞　油雞瀨　叉燒瀨　叉燒油雞燒鵝瀨　乳豬飯　乳豬叉油雞　油鴨飯　油雞米　叉燒油雞米　火腩油雞叉燒米　油豆腐　火腩油鴨　豉油皇炒米　係啵~仲有潤腸啵，好靚啊我哋呢度啲潤腸！
麥太：潤腸係嘩？好呀潤腸！咁你即係舉完例啦嘛？
夥計：舉完嘞
麥兜：媽媽，我想跟飯啊
麥太：得啦！我問你，今日個午餐到底係乜嘢？
夥計：啊？家吓仲午餐？過哂鐘啦~~